• Den kaso di un situashon di emergensia ku por tin peliger pa bida di hende, yama ambulans mesora via e number di alarma: 912
• Si durante oranan di anochi òf den wikènt tin mester di kuido i si ta trata di un kaso ku no por warda te e siguiente dia di ofisina, yama Huisartsenpost via number di telefòn +599 717 0111.
• Si mester di kuido ku urgensia den oranan di mardugá por akudí na Emergensia na hospital Fundashon Mariadal na Kralendijk. For di 11’or di anochi Huisartsenpost ta será.

Ofisinanan di dòkternan di kas na Boneiru ta duna kuido na pashèntnan ku ta inskribí na Boneiru i na turistanan riba dianan di trabou entre 8’or di mainta i 5’or di atardi. Durante oranan di anochi, den wikènt i riba dianan di fiesta e ofisinanan di dòkternan di kas aki ta traha huntu pa por ofresé kuido di dòkternan di kas durante oranan ku no ta ora di ofisina tambe. E kuido aki únikamente ta intenshoná pa kuido di emergensia, ku otro palabra: den kasonan ku no por warda te ora ku e ofisina di dòkter di kas habri durante di dia. E asistènt di dòkter na Huisartsenpost ta puntra e pashènt kua ta e kehonan. Seguidamente e asistènt aki lo yuda e pashènt dunando konseho òf e lo referí e pashènt na e dòkter di kas ku ta na warda.

Pa kuido di emergensia durante oranan di mardugá por akudí na Emergensia di hospital Mariadal na Kralendijk.

Bo ta inskribí komo habitante di Boneiru i bo tin un sédula? Den e kaso ei, e konsulta na Huisartsenpost ta grátis.

Bo ta un bishitante òf no tin sédula? Den e kaso ei, un tarifa pa bishitante ta aplikabel. Nos lo pidi pa paga mesora pa e konsulta, preferibel door di paga ku karchi (swipe) na nos bali. Seguidamente lo risibí un komprobante di pago serka nos.

Den sierto kaso por tin gastu adishonal en konekshon ku material manera fèrbant i/òf remedi.