En total tin 6 lokalidat di klínika di dòkternan di kas na Boneiru. Mas o ménos 14 dòkter di kas fiho ta traha repartí riba e diferente lokalidatnan aki. Ademas tin algun dòkter suplente na e isla ku por sustituí e dòkternan di kas ora ku esei ta nesesario. Mayoria di e dòkternan di kas ta papia papiamentu, hulandes i ingles. Algun dòkter di kas ta papia spañó tambe. E klínikanan ta repartí riba e isla i nan ta keda na Tera Kora, Antriol, Playa i Rincon.
Por akudí na kualke ofisina riba dianan di trabou di 8’or di mainta pa 5’or di atardi. Despues di 5’or di atardi, den wikènt i riba dianan di fiesta por akudí den kasonan di emergensia na Huisartsenpost na Kaya Soeur Bartola 7 na Kralendijk te ku 11’or di anochi. Durante oranan di mardugá den kasonan di emergensia por akudí na Emergensia di hospital Fundashon Mariadal na Kralendijk.
Pa e habitantenan di Boneiru, ku tin un sédula i ku ta sigurá na ZJCN, no tin niun gastu envolví pa e kuido di dòkternan di kas. Den kaso ku no tin un sédula, lo apliká un tarifanan di bishitante. Pa mas informashon tokante e tarifanan di bishitante por akudí na e klinika kaminda ta risibí kuido.
Asina ku tin un sédula, por inskribí na ZJCN (Kuido i Hubentut Hulanda Karibense). For di e momento ei lo bo tin seguro médiko na ZJCN. Despues por inskribí na un di e klinikanan di dòkter di kas. Ademas mester mèldu esaki na ZJCN na Kaya Grandi 91 na Kralendijk.
E ta importante pa ta inskribí na un klinika di dòkter di kas: den kaso ku ta inskribí na un klinika di dòkter di kas por akudí semper durante oranan di ofisina den kaso ku mester di asistensia médiko. Ademas e dòkter di kas, kaminda ta inskribí, ta atministrá bo ekspediente (dosié) médiko.
Kuido i Hubentut Hulanda Karibense.(ZJCN) ta e instansia ku ta ehekutá Seguro di Kuido na BES. ZJCN ta kai bou di e ministerio di Salubridat Públiko, Bienestar sosial i Deporte (na hulandes: het Ministerie van VWS). Riba e website van ZJCN por haña mas informashon tokante kuido sigurá i kompensashonnan.